Пратеникот Иван Стоиљковиќ од Демократската партија на Србите во Македонија прашува чии интереси брани премиерот, Зоран Заев. 

Ова следи по изјавата на косовскиот вицепремиер Енвер Хоџај дека во Хрватска, Македонија и Црна Гора разговарал за основање на пакт против Србија. 

Стоилковиќ, претседателот на Демократската партија на Србите во Македонија преку својот Фејсбук-профил упати отворено прашање до македонскиот премиер - зошто ја впрегнува Македонија во отворено непријателство со српскиот народ и Србија.

„Бидејќи никој нема храброст да го праша претседателот на Владата за неговата политика и ставот на неговиот владин кабинет во однос на најавеното учество на Македонија во создавање на 'пактот против Србија', еве јавно го повикувам да одговори и да ја информира македонската јавност во однос на ова многу едноставно прашање: На чија страна сте Вие господине Заев и чии интереси браните и застапувате? На Република Македонија или на големоалбанскиот шовинизам? Дали застапувате регионална соработка и стабилност или по теркот на фашистичкото минато ја впрегнувате Македонија во отворено непријателство кон српскиот народ и Србија“, напиша Стоилковиќ.

Енвер Хоџај во изјава за хрватскиот дневен весник „Вечерњи лист" вели дека во Хрватска, Македонија и Црна Гора разговарал за основање на пакт против Србија.

Тој вели дека идејата за Голема Србија сѐ уште е жива и секогаш е присутна во воздухот.