Откако започна постапката за разрешеување на јавниот обвинител Марко Зврлевски се зострува и трката за избор на неговиот наследник. Засега се шпекулира со имињата на адвокатот Александар Тортевски и професорите Гордан Калајџиев и Гордана Бужаровска кои се разгледуваат како наследници на првиот човек на Јавното обвинителство.

Според правниците, важно е идниот прв човек на обвинителството да работи во служба на граѓаните и добие поддршка од фелата. Сега ќе се чека и на Советот на јавни обвинители кои откако ќе биде доставен предлог до Собранието и распишан јавен оглас ќе мора да даде мислење за кандидатот. 

Роковите повторно течат за 15 дена, а ако и по нив Советот не се огласи ќе се смета дека нивното мислење е позитивно иако имаат право и негативно да се изјаснат. Сепак, тоа што веднаш се согласија со предлогот на владата Зврлевски да биде разрешен дава сигнал дека сакаат да соработуваат со новата извршна власт.