Комисијата за одлучување по прекршок при Комисијата за заштита на конкуренцијата донесе решение со кое утврди дека четири трговски друштва кои оперираат на пазарот на трговија на мало со прехранбени производи, како и Сојузот на стопански комори на Македонија како координатор, учествувале во забранет договор и/или усогласено однесување во смисла на член 59 од Законот за заштита на конкуренцијата. 

- Во постапката е утврдено дека на состанок одржан на 5 февруари 2025 година учесниците постигнале усогласен став за неприфаќање нови или зголемени ценовници од добавувачите, со што ја замениле состојбата на независно пазарно однесување со состојба на практична координација. 

Овој вид на однесување по својата природа претставува т.н. „by object“ ограничување на конкуренцијата, кое е забрането без потреба од дополнително докажување на пазарни ефекти - се посочува во соопштението кое КЗК го испрати до медиумите.

Со донесеното решение се изречени прекршочни санкции – глоби во износ од 3.075.000 денари (50 илјади евра) за секое од трговските друштва кои оперираат на пазарот на трговија на мало со прехранбени производи. 

Додека на Сојузот на стопански комори на Македонија е изречена прекршочна санкција – глоба во износ од 1.143.000 денари (18,5 илјади евра) со цел превенција на идни нарушувања и заштита на потрошувачите и пазарната конкуренција. Комисијата останува посветена на промовирање на фер, транспарентен и конкурентен пазар во Република Северна Македонија.