Договорот од Преспа мора да се почитува, а од неговото спроведување во иднина ќе се огледа и нормалното функционирање на билатерален план меѓу Северна Македонија и Грција, со што ќе се зголемува и ќе се унапредува и политичката, но и економската соработка. Ова е заденичкиот заклучок по средбата на министерот за надворешни работи Никола Димитров и поранешниот грчки премиер и актуелен претседател на Социјалистичката интернационала, Јоргос Папандреу.

Двајцата сметаат дека значењето на овој договор е историско. Од МНР велат дека било истакнато и дека Северна Македонија е вистински посветена на конструктивен дијалог со грчката влада во градењето меѓусебно партнерство засновано врз пријателство и заеднички интерес за просперитетен регион во кој граѓаните на двете држави би сакале да живеат. 

„Договорот има значително позитивно влијание врз билатералните и регионалните случувања во однос на зголемена економија, стабилност и просперитет. Неговото понатамошно спроведување се смета за голем чекор во нормализацијата на билатералните односи што ќе им овозможи на двете држави да го искористат целиот потенцијал на политичката и економската соработка, рече Димитров на средбата.

Тој, како што соопшти МНР, ги истакна посветеноста и заложбите на Грција за остварување на европските и евроатлантските перспективи на Северна Македонија и уште еднаш укажа благодарност за грчката поддршка на последниот ЕУ Самит во Брисел и континуираните напори за отпочнување на пристапни преговори со ЕУ.

Посетата на Папандреу на Скопје е во рамките на неговата турнеја во земјите од Западен Балкан, со цел поддршка и зајакнување на евроинтегративниот процес на земјите од регионот.