Пропусти се случуваат, важно е да има одговорност, изјави министерот за внатрешни работи, Оливер Спасовски на Тв21 за пасошот кој го добил контраверзниот украински бизнисмен Олександар Онишченко. 

Тој вели дека не сака да прејудицира околу резултатите од внатрешната истрага во АНБ.

„Едно е дисциплинската одговорност… овде треба да се види дали има и некаков друг вид на одговорност. Ако има, и таа треба да се покрене“, додаде Спасовски.

„Секаде може да се случат одредени пропусти. Прашањето е дали тие пропусти ќе бидат оставени по страна или тие ќе бидат процесуирани. Овде одговорот е јасен и тоа директорот (Димовски) го соопштува – дека ги расчистува работиве и се преземаат соодветни мерки,“ рече Спасовски.

Седница на собраниската Комисија за надзор над работата на Агенцијата за национална безбедност и на Агенцијата за разузнавање на која присуствуваше директорот на АНБ, Виктор Димовски, вчера се одржа зад затворени врати.

Но, за Слободен печат, бизнисменот тврдеше дека престојувал во Скопје и самиот легално ја средил процедурата. 

Сепак, газдата на куќата на чија адреса е заведен тој, бурно реагираше кога пред врата му дојде новинарска екипа и нападна снимател.