На првата меѓународна конференција за спречување на перење пари во Македонија се говореше за повеќе истраги кои се во тек, а со нив се опфатени како политичари така и бизнисмени. Македонија треба да заземе посериозен пристап во борбата против финансискиот криминал, е еден од главните заклучоци на конференцијата.

„Институциите задолжени за спроведување на законот треба и мора, со соодветен интензитет, да ја унапредуваат и прилагодуваат својата подготвеност за ефикасно спротивставување кон предизвиците што ги носи феноменот на перењето пари. Особено во делот на квалитетно кадровско екипирање и нормативна поставеност и опсег. А логистиката во тие задачи мора да дојде токму од стручната и експертска фела, како фундаментална концепциска инфраструктура во справувањето со посочениот проблем“, рече министерот Спасовски. 

Според обвинителката на СЈО, Ленче Ристовска, потребно е системско решение. Само доколку сите засегнати институции работат заедно, финансискиот криминал ќе се сузбие навреме, вели Ристоска.

„Мислам дека е потребна инклузивност на сите чинители во општеството од овој сегмент, и сметам дека е потребен еден голем интердисциплинарен пристап, така што секој со најдобрите практики од својата област може да придонесе кон изнаоѓање на најсоодветните решенијка“, изјави обвинителката Ленче Ристоска.