Здружението за меѓународна политика „Совет на Амбасадори“ смета дека е прерано започната кампањата за вонредните парламентарни избори што треба да се одржат на 12-ти април, 2020 година и апелира без понатамошно одложување истата да престане. 

„Одржувањето на секојдневни митинзи и говори на лидерите на политичките партии во овој период, може да придонесе кон зголемување на политичката конфронтација во општеството и дополнително да ги продлабочи општествените поделби, соопштуваат од Советот додавајќи дека нивниот став е дека партиите треба да престанат со одржувањето митинзи и говори се до официјалниот почеток на изборната кампања, во март следната година. 

„Политичките партии и лидери треба својата енергија во овој период да ја насочат кон спроведување на потребните реформи за осварување на стратешките цели на земјата, како што се членството во НАТО и добивањето датум за започнување преговори за членство во ЕУ.

 Советот на Амбасадори смета дека е време ефективно да се искористи подршката од САД и од земјите-членки на ЕУ за интензивирање на реформите и соработката со соседите, со цел веднаш по добивањето датум за започнување на преговорите за членство во ЕУ да се затвораат поглавјата со што побрза динамика“, посочуваат од Советот на Амбасадори.