Власта го обезбеди финансирањето на државните потреби за идната година.

Собранието го изгласа Буџетот за 2020 година со 65 гласа „за“. 

Буџетот за догодина е насочен кон инвестиции во човечкиот капитал, односно вложување во подобро здравство, образование и социјала, соопштија од Владата.

Пратениците почнаа со расправа во 13 часот, а по кратката пауза, продолжија до доцните попладневни часови.  

На последниот ден од расправата за државната каса за идната година, пратениците добија голема желба да се препукуваат и надмудруваат меѓу себе за тоа кој подобро или полошо направил за економијата.

Фрчеа реплики и контрареплики, кој повеќе придонел за индустријата, кој повеќе ја задолжил државата, кој го зголемил животниот стандард, и дали растот на пензите и палтите е или не е предизборна корупција. 

Денеска беше петтиот ден од расправата за буџетот на пленарна седница, а согласно собранискиот деловник, мора да биде и последниот, бидејќи толку се предвидени за дебата на пленарната сесија. 

Од досегшните дискусии можеше да се забележи дека опозицијата буџетот го третира како неразвоен и наменет за предизборно купување на граѓаните, а владејачките партии го бранат дека е во согласност со растот на домашната економија и е во насока на фискална стабилизација, како и дека со зголемените плати и пензии со него ќе се инвестира во човечки капитал.

Буџетот за идната година е најгломазен досега и тежи 3,9 милијарди евра, додека на страната на приходите се очекува да се соберат 3,6 милијарди евра.