Со комплетирани 4,5 милиони евра од стечајната маса се заокружи целосната исплата на придонесите на 1.020 работници од некогашното АД ТИПО-Скопје, кое покрај туланата, ги вклучуваше стоковните куќи „Меркур“ и три одморалишта во Охрид, Струга и Дојран.

Некогашното имотно претпријатие влезе во стечај во март 2005-та година поради долгови и нерентабилно работење, а како резултат на тоа многумина не можеа да дочекаат достоинствено пензионирање поради неплатени придонеси од септември 1997-ма. Во 2009-та дури имаше и протести пред Владата на РМ.

- Тоа беше приоритет според законот за исплата на претпријатијата во стечај. Остануваат платите и долговите кон доверителите, но веќе поголемиот дел од имотот е продаден. Остануваат уште неколку објекти од имотот „Партизанка“ во Драчево, додека од погоните во „Пролетер“ во Топанско Поле е распродадено се - изјави стечајниот управник Драги Момировски.

Ретроактивно стажот беше исплаќан прво за две и пол години, а последниот месец за пет години. Според законот, тој е исплатуван по пресметка на минимална плата.

А.К.