Градската власт ќе ја подига атрактивноста на туристичката понуда во главниот град со набавка на нови седум електромобили, овој пат во ретро-стил. Постојните пет се обични електровозила и се отворени, односно кабриолети, со три седишта плус она за возачот. Тие беа купени пред две години како дел од проектот „Електра“ на „Градски паркинг“, а ги користат туристите за разгледи на центарот на Скопје.

Персонални транспортери – електротротинети, наскоро ќе може да се изнајмуваат од „Градски паркинг“ со цена од 100 денари за час во рамки на проектот „Електра“.

Новите возила се уште не се промовирани во јавноста а изнајмувањето на новите возила ќе биде усвоено  на следната седница на Советот на Град Скопје пренесува Дневник.

За намалување на загаденоста на воздухот „Градски паркинг“ располага и со 250 велосипеди, кои се дел од проектот „Изнајми велосипед“.

- Сите овие велосипеди, и електро и обичните, овозможуваат зголемена мобилност на граѓаните и на посетителите на Скопје, како и достапност до сите знаменитости од културно-историско значење. Велосипедите може да се употребуваат како алтернативно превозно средство, особено во централното градско подрачје, што значи намалување на нивото на штетни гасови во воздухот и почиста животна околина. Исто така, електровелосипедите се добра можност за исполнување рекреативни и туристички цели – велат од претпријатието. Електровелосипедите, кои во моментов се 10, ќе бидат достапни за изнајмување само на една локација, на плоштадот „Македонија“, исто како и електромобилите. Цената за возење со нив е 100 денари за 20 минути. Обичните велосипеди, пак, може да се изнајмат на јавните паркиралишта „Треска“, кај Градската болница, кај Општата болница „8 Септември“, во Аеродром зад ТЦ „Бисер“, како и во катната гаража „Св. Kирил и Методиј“.

(Извор: Дневник)