Со 10 нови бунари ќе се решава водоснабдувањето во Прилеп
За две недели се очекува во Прилеп да бидат во функција 10-те нови бунари, проект на Министерството за транспорт и врски и на прилепски Водовод од околу 600.000 евра и препумпната станица во стариот резервоар, со цел вода да имаат и високите делови на градот, проект на „Водовод и канализација„ вреден 200.000 евра. Со двата клучни зафати Прилеп ќе го реши проблемот со водoснабдувањето во периодот кога e намалена дарежливоста на изворот Студенчица.
- Кога е намалена дарежливоста на Студенчица, тогаш најголем ефект имаат бунарите и пепумпната станица. Бунарите ќе носат дополнителни 120-ина литри вода во секунда, а препумпната станица е да обезбеди притисок за високите зони како што се населбите Рид, Варош, Точила, Тризла, вели Сашо Николоски директор на јавното претпријатие „Водовод и канализација.
Градоначалникот Марјан Ристески е задоволен што една битна тема во Прилеп се симнува од дневниот ред. Со бунарите, препумпната станица и со замената и обновата на водоводната мрежа што почна со грантот на КФВ банката, а ќе заврши за неколку години со средства на претпријатието, градот за наредните децении го решава главниот проблем.
Од Јавното претпријатие нагласуваат дека за се да се одржува, неопходна е перманентната работа и активност на стручните екипи на теренот. Работата многу ќе ја олесни и подземниот катастар кој ќе ги детектира веднаш проблемите и дефектите.
Слично
Поврзани вести
