Според денешното известување од ЈСП Скопје поради снегот се скратени или не сообраќаат повеќе градски и приградски автобуски линии.

Снегот е причина за да не сообраќа автобусот до Нерези (Македонско село) и приградските линии 64, 80, 80а и 180.

Според соопштението на ЈСП „Скопје“, автобусот со број 16 место до Пржино сообраќа до црквата „Св. Петка“, автобусот со број 3 место до „Панорама“ сообраќа до Клинички центар, а автобусот со број  24 сообраќа само до Кисела Вода.

Од приградските линии, автобусите со број 58, 58а и 58б место до селата во општина Сопиште сообраќаат до Кисела Вода.

Автобусот со број 164 сообраќа до Орман, 160 до Шишево, 81 до Чучер, 74 до Драчево, а 73 до фабриката Усје. Автобусите со број 11 и 11а место до Рашче и Горно Свиларе сообраќаат до рампата пред селото, автобусот со број 32 сообраќа до Сарај, 47 до Радишани, а 47а до Љуботенски пат.

Автобусите со број 51 и 51а сообраќаат до крстосницата пред селото Студеничани, 53 оди само до село Катланово, 55 сообраќа до мостот пред Арачиново, а 55а место до Брњарци до крстосницата.

Автобусот со број 61 место до селото Побожје сообраќаа до Каменоломот, 63а оди до Бунарџик, 64а до Орман, а 65 и 65б до Црешево. Автобусот со број 65а место до Страчинци сообраќа до гробиштата, 68 до Ржаничино, а 70 место до Батинци, сообраќа до главниот пат до вториот мост.

Од ЈСП „Скопје“ информираат дека контактираат со Зимската служба на Град Скопје и во зависност од временските услови се очекува поголем дел од овие линии  повторно нормално да сообраќаат.

Редовните патниците утрово беа револтирани од доцнењето на автобусите. Снегот и голомразицата го забавија темпото на вообичаениот возен ред, па одделни линии доцнат и по триесетина минути.