Апелација ја одби жалбата на Жан Митрев, при што сметките на болницата остануваат блокирани.

„Апелација информира дека постапувајќи по кривичниот предмет КЖ-208/23, по одржана јавна седница донесе решение со кое ја одби како неоснована жалбата на обвинетиот Ж. М. од С. и обвинетото правно лице ПЗУ Клиничка болница Ж. М. од С., изјавена преку бранителите и решението на Основниот кривичен суд Скопје К.бр.349/23 од 24.02.2023 година, со кое предлогот за определување на привремени мерки за обезбедување на имотно-правно побарување на Основното јавно обвинителство Скопје КО.бр.2859/22 од 23.02.2023 година према обвинетиот Ж.М. и обвинетото правно лице ПЗУ Клиничка болница Ж. М. од С. е уважен, го потврди. Советот на овој суд најде дека првостепениот суд правилно постапил кога го прифатил предлогот на Обвинителството и спрема обвинетите определил привремени мерки – забрана за оптоварување и располагање со недвижноста наведена во изреката на решението, како и забраната за исплата на износите наведени во изреката на обжаленото решение од сметките на правното лице за износите за кои е определена мерката, наоѓајќи дека се исполнети сите законски услови“, велат од Апелациониот суд.

Лекарот Жан Митрев и неговата болница, се товарат за продолжено кривично дело „измама“.

Предметот е оформен по допрен глас, откако ИРЛ лани објави документарец по наслов „Нечиста крв“ за наводни измами при користење на методата хемофилтрација при лекување на пациенти со ковид-19.