Министерот за здравство Венко Филипче денеска најавувајќи го стапувањето на сила на рестриктивните мерки од петок, до 20. јануари упати апел до граѓаните дека целта на оваа кампања „Празнувај одговорно“ е токму подигнување на свеста за да се спречи понатамошното ширење на корона вирусот и да не дојде до зголемување на бројот на новозаразени во јануари кога ќе поминат празниците. Министерот порача дека славењето може да почека, но здравјето не и дека не смееме да дозволиме празнувањето да ни се претвори во лош спомен.

Осврнувајќи се на актуелната епиедмиолошка состојба во земјава, тој истакна дека таа е стабилна, но се уште има голем број на заболени и на хоспитализирани пациенти.

-Болниците сеуште се под притисок, но во континуитет има слободни кревети. Веќе цела недела бројот на слободни болнички кревети е константен. Имаме околу 150 слободни кревети во државава. Вчерашната анализа покажува дека РХ-факторот е под 1, односно 0,95, но тоа во исто време е нешто што не треба да не опушта. Се уште има голем број на заболени и не смееме да си дозволиме да се опуштиме, рече Филипче.

На прес-конференцијата уште еднаш ја искористи можноста да апелира граѓаните да не подлегнуваат на ширењето на лажни вести во однос на вакцината, посочувајќи дека таа е навистина безбедна.

-Да не се подлегнува на лажни вести дека вакцините не се безбедни. Вакцината на ковид-19 е безбедна и јасно кажувам дека примарната цел е заштитата на населението, потенцираше Филипче.