Како што беше најавено денешниот мирен протест на средношколците кои добија поддршка од студентите, наставниците , професорите и бројни родители започна.

Неколку илјади ученици со транспаренти во рацете „Не си го реформирај образованието министре“, „Полесно се добива стипендија во странство отколку одговор од МОН“ , „Стоп за лошите реформи“, „Експерименти се прават во лабораторија а не врз ученици“, „А кој не праша нас“ се собраа на збирното место пред Фонтаната во градски парк од каде точно напладне го означија стартот на Третиот голем средношколски марш .

Од градскиот парк се упатуваат кон Влада каде им се придружуваат студентите и на крај ќе стигнат пред МОН .

Денес е тринаесетиот ден во кој гимназијалците ја бојкотираат наставата.

Тие остануваат на нивните барања  - враќање на стариот концепт на полагање на државна матура, Законот за екстерното тестирање да биде ставен во мирување и електронското полагање на државна матура да се укине а доколку не бидат ислушани и не им биде прифатена средба од Министерот Адеми тие најавуваат поригорозни мерки и кампување пред Влада.

Уште пред десет дена Адеми им вети средба, но до ден денес не е реализирана ниту една со што средношколците се уште поизреволтирани , а од Средношколскиот пленум, секојдневно потенцираат дека врз се вршеле притисоци од директорите на училиштата и од некои професори, да престанат со бојкотот.

(Фото:булевар.инфо)