СКОПСКИТЕ ОПШТИНИ „НАПАДНАА“ ПО ГРАДОТ СКОПЈЕ И КОМУНАЛНА ХИГИЕНА - граѓаните си плаќаат, да им го исчистат сметот
Скопските градоначалници, без разлика дали се од СДСМ или ВМРО-ДПМНЕ, го повикуваат Градот Скопје и Комунална хигиена, итно да го расчитат сметот од подрачјата на нивните општини.
Градот Скопје и „Комунална Хигиена“ итно да изнајдат решение за собирање на сметот во Аеродром, бара општина Аеродром предводена од Тимчо Муцунски од ВМРО-ДПМНЕ.
„Обврска и одговорност на секој менаџер, вклучително на директорите на јавните претпријатија и градоначалникот на Град Скопје е да воспостават и одржуваат систем за соодветно менаџирање на ресурсите со кои располагаат и на таков начин да обезбедат квалитетна услуга за граѓаните. Чистотата, јавната хигиена и одржување на здрава животна средина е јавен интерес од кој сите имаме бенефит.
Делот на хигиената во Скопје кој е во надлежност на градските служби подолг временски период е во лоша состојба, а изминатите неколку денови, за жал градското јавно претпријатие „Комунална хигиена“ не успеа да најде начин како да го менаџира системот на одржување на чиста животна средина. Насекаде гледаме полни контејнери, а ние граѓаните ја трпиме штетата од неумесното и неодговорно менаџирање со јавното претпријатие.
Преполните контејнери смет и лошиот мирис кој се шири во општината е одговорност на Градот Скопје и Јавното претпријатие „Комунална хигиена“. Граѓаните одговорно и навремено ја плаќаат комунална такса и тие заслужуваат чиста и средена општина. Токму поради тоа апелираме до надлежните, да ја тргнат политиката на страна и итно да изнајдат соодветно решение за собирање на сметот во општина Аеродром“, се вели во реакцијата од општината.
Општина Центар алармира до Град Скопје за неисчистените контејнери и преполните канти со смет, поради протестот на ЈП Комунална хигиена - Скопје. Голем број граѓани денеска се пожалија во општината поради нехигиената и неподносливата миризба која се шири поради преполните контејнери по булеварите и улиците на главниот град. Општина Центар апелира на итна реакција од Градот Скопје под чија надлежност е ЈП Комунална хигиена.
Ние како Општина со своето претпријатие ќе продолжиме со активно одржување на општинските површини. Предупредуваме, надлежните од Градот да не бараат оправдувања туку веднаш да дејствуваат, високите температури надвор, најмалку дозволуваат главниот град да биде претрупан со смет. Граѓаните плаќаат комунална такса и сакаат чиста општина и чист град.
Слично
Поврзани вести
