Истражителите на Специјалното јавно обвинителство без оглед на сите притисоци кои ги добија од членството на ВМРО-ДПМНЕ ја завршија работата во Охрид и спроведени се сите планирани дејствија на сослушување на околу 200 осомничени или сведоци од донаторите на партијата, пренесува ТВ 24.

Оттаму посочуваат дека анализата на донаторските активности од 2014 - та ќе продолжи и понатаму, a како во иднина ќе се спроведуваат законите останува тајна.

Вмровскиот пратеник Љубен Арнаудов во телефонски разговор вели дека останува на истиот став, нема да ја прифати поканата за распит и ќе се брани со молчење. И тој и сопартијците се во исчекување на следните потези на СЈО и не сакаат да ги коментираат деталите.

СЈО претходно напомена дека веќе била нарушена тајноста на постапката, а кривичниот закон за непојавување на сведок на распит, предвидува присилно приведување или парична казна од 200 до 1200 евра во денарска противвредност.