Специјалното јавно обвинителство (СЈО) има сведоци кои потврдуваат дека високи функционери на власта местеле избори, објави „Мета“. 

Сведоците засега се заштитени и имињата ги знаат само неколку обвинители за да се заштити нивната приватност.

„ СЈО има сведоци кои потврдуваат дека се местеле избори. Тие ќе го урнат митот за чиста победа на владејачката гарнитура“ – брифира извор близок до СЈО за „Мета“.

Од СЈО велат дека освен материјални, имаат и вербални докази, меѓутоа во интерес на истрагата не можат да откријат повеќе детали. 

На 12 февруари годинава, СЈО ги осомничи екс министрите за внатрешни работи, Гордана Јанкулоска, за транспорт и врски, Миле Јанакиески, генералниот секретар на владата и други непознати лица, како сторители на кривични дела против изборите и гласањето. Ова е првиот случај за кој Специјалното обвинителство (СЈО) на Катица Јанева поведе истражна постапка, а се води под името „Титаник“. Поднесени се обвиненија и против пет судии од Управниот суд, како и против четири члена на ДИК од 2013 година.