Специјалното јавно обвинителство демантира дека прислушкуваните разговори кои ги објавува Ел Чека на социјалните мрежи би можело да потекнуваат од оваа институција и дека вчерашната изјава на специјалната обвинителка Катица Јанева е погрешно протолкувана. Од таму не наведуваат дали ја поседуваат истата содржина од прислушкуваните материјали.

„Во врска со написите во повеќе медиуми, како и различните толкувања на вчерашната изјава дадена од страна на Специјалниот јавен обвинител, ѝ појаснуваме на јавноста дека новообјавените разговори објавени од Фејсбук профилот со псевдоним „Ел Чека” не потекнуваат од Јавното обвинителство за гонење на кривични дела поврзани и кои произлегуваат од содржината на незаконското следење на комуникациите. Во оваа смисла, ја уверуваме јавноста дека сите аудио материјали со кои располага ова Јавно обвинителство се чуваат под строго пропишани безбедносни процедури кои опфаќаат физичка, административна и информатичка безбедност на информациите. Воедно, при анализа и обработката на материјалите се постапува согласно со воспоставените интерни правилници и процедури за евидентирање на процесот на преслушување и обработка на материјалите, како и обврската за целосно почитување на принципот на тајност и заштита на приватноста на граѓаните на Република Северна Македонија и други лица, гарантирана со Уставот и Европската конвенција за човекови права, и со тоа на секое лице да му се гарантира почитување и заштита на приватноста на неговиот личен и семеен живот“, гласи соопштението на СЈО.

Од таму додаваат дека ја гарантираат безбедноста на сите аудио материјали со кои располагаат откако Јанева вчера рече дека не може со сигурност да потврди дали бомбите се од СЈО затоа што во овој момент, како што рече, тоа се истражува. 

„Во оваа прилика, како и повеќе пати досега, ги повикуваме сите субјекти кои поседуваат аудио материјали кои се предмет на незаконско следење на комуникациите истите да ги достават до Јавното обвинителство за гонење на кривични дела поврзани и кои произлегуваат од содржината на незаконското следење на комуникациите“, се вели во реакцијата.