Како што соопштивме експертот кој СЈО го чекаше да дојде, дојде ја заврши работата и си замина.

Имено, преку соопштение до јавноста од тимот на Катица Јанева соопштија дека е извршено одземање на сите податоци од серверите.

„Во текот на денешниот ден, со помош на надворешен експерт обезбеден од производителот на помошните сервери кои се во сопственост на телекомуникациските оператори, а физички се наоѓаат во Управата за безбедност и контраразузнавање, беше извршено одземање на сите податоци од помошните сервери согласно судската наредба“, соопштија од СЈО.

Оттаму појаснуваат дека предметот е во предистражна постапка и во овој момент не се во можност да обезбедат дополнителни информации. 

Одземените податоци ќе бидат предмет на анализа и нивните наоѓања ќе бидат благовремено споделени со јавноста.