Според претседателката на државата, Гордана Сиљановска-Давкова изјавата на лидерот на ДУИ, Али Ахмети за протести е притисок врз судската власт. 

Вели дека Ахмети не треба да врши притисок врз судската власт бидејќи единствено таа е надлежна да одлучува кој ќе биде кривично гонет. Ахмети се закани со протести ако поранешниот министер за економија,  Крешник Бектеши биде обвинет за пожарот во Кочани. 

„Сите, а и господинот Ахемти и ДУИ многупати се повикувале на независноста на судската власт. Меѓутоа, ваквиот говор всушност значи притисок врз судската власт. Не сакам да давам оценка на квалификацијата, веројатно е момент на слабост или момент на искреност, но, верувам дека триесет години потоа, а особено и тој 20 години потоа во власта, ние треба да го почитуваме начелото на поделба на власта и партиите треба да се држат настрана“, рече таа. 

За пожарот во дискотеката Пулс под истрага се неколкумина поранешни министри за економија, градоначалниците на Кочани, директори на Дирекцијата за заштита и спасување и Пазарниот инспекторат. Во пожарот загинаа 62 луѓе. 

Евентуалното обвинение за Бектеши за кој лидерот на ДУИ вели дека е политички прогон, не само што според Ахмети ќе ги извади интегративците на улица, тие ќе дадат и поддршка на протестите на семејствата на кои им загинаа децата во Кочани, но и како што вели Ахмети нема да се повлечат додека не се обезбеди неселективна правда и предвремени парламентрни избори.