Вонредната состојба во Македонија наметна нов живот. Хипер-побарувачката за одредени производи сега се прави од дома елекронски, луѓето на овој начин ги избегнуваат долгите редици пред супермаркетите. Но, e-tinex.mk и Paket.mk, интернет супермаркети не може да постигнат со нарачките. Доколку нарачате сега достава до вашиот дом, производите најверојатно ќе ви пристигнат пред или на почетокот на април.

Paket.mk е интернет супермаркет кој  овозможува избор на повеќе од 4.000 намирници достапни за достава. Сервисот е едноставен за користење, но во овој момент велат од таму дека побарувачката е зголемена за седум до осум пати повеќе и дека последните што нарачале ќе ги чекаат своите производи до следниот понеделник. Подружницата e-tinex.mk на Тинекс-МТ овозможува купување на голем дел од асортиманот на производи кои се наоѓаат во самите маркети преку електронски пат за сметка од најмалку 300 денари. И од таму за „Фактор“ велат дека оние што нарачувале во текот на вчерашниот ден ќе треба да ја чекаат доставата до 1 или 2 април, бидејќи се зафатени сите слотови.