Службеници во администрацијата на американскиот претседател Доналд Трамп ги анализираат можните последици од наглиот пораст на цените на нафтата, вклучувајќи сценарио во кое цената би можела да достигне 200 долари за барел, објави Блумберг.

Според извори запознаени со ова прашање, анализите се дел од редовните проценки за време на кризни ситуации и не се наменети за предвидување на идните движења на пазарот.

Целта е администрацијата да биде подготвена за различни сценарија, вклучувајќи ја и можноста за продолжен конфликт.

Изворите велат дека дури и пред почетокот на војната, американскиот секретар за финансии Скот Бесант изразил загриженост дека конфликтот може да доведе до пораст на цените на нафтата и негативно да влијае на економскиот раст.

Високи претставници на Министерството за финансии наводно со недели ја предупредувале Белата куќа за флуктуациите на цените на нафтата и бензинот. Портпаролот на Белата куќа, Куш Десаи, ги отфрли извештаите дека администрацијата разгледува сценарио од 200 долари за барел, нагласувајќи дека владата редовно проценува различни сценарија за цени, но дека секретарот за финансии не е загрижен за „краткорочни нарушувања“ на енергетскиот пазар.

Откако започна конфликтот, цените на нафтата значително се зголемија. Цената на нафтата WTI во САД се зголеми за околу 30 проценти на околу 91 долар за барел, додека суровата нафта Брент скокна за речиси 40 проценти и се тргува на околу 102 долари. Американскиот секретар за енергетика, Крис Рајт, претходно изјави дека сценариото во кое цената на нафтата ќе достигне 200 долари за барел е „малку веројатно“.

Сепак, аналитичарите предупредуваат дека дури и пониските цени би можеле да имаат значително влијание врз економијата.

Според Блумберг, цената од околу 170 долари за барел во текот на неколку месеци би можела да ја зголеми инфлацијата во САД и Европа и да го забави економскиот раст.

Еден од клучните ризици е потенцијалното нарушување на испораките преку Ормутскиот теснец, низ кој минува приближно една петтина од глобалниот извоз на нафта и гас.

Во САД, малопродажните цени на бензинот веќе се зголемија за околу 30 проценти, додека претседателот на Федералните резерви, Џером Пауел, нагласува дека сè уште е прерано да се процени целосното влијание на зголемувањето на цените на енергијата врз американската економија.