Кандидатот од партијата на СДСМ кој ќе се бори за градоначалничката фотелја во главниот град денеска изјави дека Скопје ќе добие нова услужна локална власт, подеднакво посветена и отворена за сите граѓани.

Петре Шилегов ветува транспарентно и домаќинско работење, и трошење на буџетот исклучиво во интерес на граѓаните и тоа за нивни реални, потреби. 

Шилегов кој моментално е пратеник вети подобра патна инфраструктура за поврзани и безбедни граѓани, побезбедена чиста вода и чист воздух за здрави граѓани, повеќе пари за граѓаните за подобар и полесен живот.

„Додека голем дел од граѓаните на Скопје се уште немаат достојна патна инфраструктура, водоводна и канализациска мрежа, Коце Трајановски ги исполнуваше желбите на Никола Груевски и потроши милиони евра за мегакриминалниот проект Скопје 2014.

Додека скопјани секоја зима буквално се гушат од загадениот воздух, Груевски и Трајановски стихиски ги уништуваа дрворедите, парковите и сите зелени површини во градот.

Град Скопје има итна потреба од нова градска власт која што системски ќе го реши проблемот со загадувањето, ќе изготви и изработи модерни ефикасни и еколошки решенија во јавниот превоз, ќе го зголеми процентот на зелени површини во градот и ќе овозможи алтернативни извори на енергија“, рече Шилегов.