Нов софтвер ќе овозможи даночните обврзници да добиваат навремени информации за статусот на нивниот предмет поднесен во Град Скопје или даночната обврска, по пат на СМС или е-маил.

Оваа услуга денеска ја најави скопскиот градоначалник Петре Шилегов кој посочи дека истата ќе почне да функционира на почетокот на 2018.

Шилегов вели дека со оваа услуга граѓаните ќе се поштедат од стресот и изгубеното време на шалтерите на кои ги подмируваат своите даночни обврски.

Тој рече дека со овој софтвер овозможуваат по пат на СМС или е-маил, даночните обврзници да добиваат навремени информации поврзани со статусот на нивниот предмет или даночна обврска. По прием на предметот, граѓанинот ќе добие потврда по СМС дека предметот е примен, а понатаму,  до крајот на постапката, ќе добива нова порака со соодветна информација за секоја промена на статусот на предметот.

Шилегов меѓу другото објасни дека ќе се активира и делот за проверка на имот или финансиска состојба поврзана со данокот на имот или со фирмарината, на официјалниот Интернет портал на Град Скопје. 

-  Со ова им овозможуваме на граѓаните доколку имаат проблем поврзан со нивниот имот, да можат да го пријават по електронски пат. Насоката во која се движиме е администрација што ќе има слух за брза реакција за решавање итни проблеми, но и олеснет начин за решавање на едноставни, задолжителни прашања кои досега непотребно им одземале време на нашите сограѓани. Скопје е град за сите. Затоа активно работиме на модел кој продуцира квалитетни услуги за граѓаните – нагласи Шилегов.