Петре Шилегов, градоначалникот на Скопје, во најавата за воведување на катастар на зелените површини наведе дека во главниот град досега се евидентирани 65.844 дрвја и 28.395 грмушки по геодетско снимање и прегледот на парковска инфраструктура. 

Градоначалникот наведе дека е изработена ГИС апликација за преглед и управување со јавното зеленило на територијата на Град Скопје.

– Со геодетското снимање опфатено е зеленило на површина од 650 хектари. Во оваа фаза тоа го опфаќа булеварското зеленило и парковското зеленило што е под надлежност на Град Скопје. Исто така реализирана е т.н. инвенторизација на теренот која подразбира попис на дрвјата и грмушките, со собирање податоци за видот на дрвото, неговата здравствена состојба, големина, ширина и неговата точна местоположба. Досега се попишани точно 65.844 дрвја и 28.395 грмушки. Во следните фази предвидено е снимање на зелените површини на институциите што се под надлежност на Град Скопје (јавните претпријатија, јавните установи, средни училишта… – нагласи Шилегов.

Евиденцијата на зеленилото ќе се надополнува и во соработка со скопските општини, односно со податоците од блоковско зеленило, зеленило под надлежност на основните училишта и градинките кои се под нивна надлежност. 

Понатаму во „зелениот катастар“ се предвидува и отворање модул во кој секој граѓанин ќе може да го впише и зеленилото од сопствениот двор.