Министерката за одбрана Радмила Шекеринска вели дека вложуваат во  добрососедските односи и очекуваат тоа да го направи и Бугарија.

Вели дека Договорот кој го потпишаа е со цел градење на доверба. 

Смета дека треба со аргументи за да се најде решение, не со емоции и со обид да се наметне решение. 

„Дефинитивно одлуките што ќе се носат до крајот на годината ќе влијаат позитивно или негативно на тие односи и тоа нема да бидат само нашите билатерални односи, туку ќе влијаат на регионот. Очекуваме токму државите што ги отвораа вратите, сега да ја покажат истата волја, интерес и желба да помогнат регионот да тргне напред“, рече Шекеринска.

Таа додаде дека со бугарскиот колега Красимир Каракачанов има теми околу кои не се согласуваат, но, и двајцата се избрани да работат регионот да биде стабилен и безбеден.

Коста Филипов, публицист и добар познавач на македонско-бугарските односи, како гостин во студито на бугарската национална телевизија рече дека македонскиот премиер Зоран Заев со изјавата дека Бугарија може да ја запре Македонија во добивањето на датум за преговори всушност испратил сигнал до Германија да започне со притисок врз Бугарија.

Откако Софија притиска со можна блоклада на преговорите на Македонија, Стојко Стојков, копретседател на партијата на Македониците во Бугарија, ОМО Илинден - Пирин  вели дека источниот сосед сака да ја уцени Македонија.