Министерката за одбрана, Радмила Шекеринска, денеска попладне во Блед ќе оствари средба со Метју Палмер и ќе има прилика да му честита за новоназначената функција специјален претставник на САД за Балканот.

Палмер наедно е заменик-помошник за Европа и Евроазија на државниот секретар на САД, Мајк Помпео, и важи за добар познавач на Балканот. Неколку пати ја посети Македонија и оствари бројни средби со наши функционери, а за истрагата за случајот „Рекет“ рече дека мора да се расчисти, а државата да донесе нов закон за СЈО.

Вицепремиерката денеска и утре во Словенија ќе учествува на 14. Бледски стратегиски форум, каде заедно со словенечкиот министер за одбрана, Карл Ерјавец, и министерот за надворешни работи на Шпанија, Џозеф Борел, ќе се обрати на панелот насловен „Што следува? – поглед на евроатлантската безбедност, 70 години по Вашингтонскиот договор“.

Бледскиот стратегиски форум секоја година е местото каде што се среќаваат влијателни светски и европски политичари и државници. Форумот претставува една од водечките меѓународни конференции во Централна и Југоисточна Европа.