Бугарскиот министер за одбрана, Красимир Каракачанов денеска по средбата во Софија со македонската министерка за одбрана,  Радмила Шекеринска изјави дека Бугарија го поддржува членството на Македонија во НАТО и во ЕУ и по потпишувањето на Договорот за добрососедство веќе нема спорни прашања меѓу двете земји. 

„За нас нема проблем со името на Република Македонија“- изјави  Каракачанов. 

Тој рече дека приоритет на бугарското претседавање со Советот на ЕУ што почнува од 1 јануари ќе биде евроинтеграцијата на земјите од Западен Балкан.

Шекеринска вели дека потпишаниот Договор за добрососедство не е само парче хартија, туку платформа за градење успешна соработка меѓу Македонија и Бугарија во сите области.

Таа со Каракачанов разговарала за повеќе конкретни области меѓу кои за обука на армиските припадници, заеднички вежбовни активности и размена на искуства за реформите во одбраната и за евроатлантскиот интегративен процес.

Шекеринска и Каракачанов денеска во Софија потпишаа и два протокола за соработка во областа на военото воздухопловство и за лабораториски испитувања на горива, подмачкувачки материјали и специјални течности.