Бизнисменот Сеад Кочан посочи дека повеќе не е управител на градежната компанија „Трансмет“ и на тој начин се обиде да и посочи на СДСМ дека напразно го обвинуваат за добиениот тендер за реновирање на обиколницата погодена од скопските поплави. Нов управител на компанијата Трансмет е Чедо Кочан, братот на бизнисменот Сеад Кочан. 

Трансмет последниот тендер за обнова на обиколницата го доби со непосредна спогодба, односно преговарање, наместо класична тендерска постапка. Чедо Кочан сега е прв човек на компанијата која беше дел од новинарските истражувања, пред се поради големиот број тендери кои ги добила од владини институции и општини. Сеад Кочан посочи и дека постапката за реконструкција на обиколницата била транспарентна и според законите.

Инаку, опозицијата реагираше на оваа владина одлука и рече дека тие се согласуваат дека санацијата на обиколницата е итна, но тоа требаше да се реализира пред три месеци, а да не се чека толку за да се одреди компанијата. 

До сега требаше да биде готова – рече Дамјан Манчевски од СДСМ. Тој потсети дека од 2012-та до денес Трансмет добила над 63,4 милиони евра од државни тендери. Манчевски рече дека по изборите ќе бараат одговорност за матната зделка за обиколницата која му пресуди на Смилковци.