Од нова година Владата ги укинува или намалува царинските стапки за репроматеријали за резервни автомобилски делови, полиетиленски фолии, алатни машини, железнички товарни вагони и автобуси,  како директна поддршка на пет стопански гранки. - Укинувањето на царинските стапки за тие стоки е во функција на подобрување на условите за стопанисување на домашните производители, развој на индустријата и поголем извоз на странските пазари, вели Министерот за финансии Зоран Ставрески. Според Ставрески, бидејќи во Македонија работат индустриски капацитети коишто произведуваат автомобилски делови, како поддоговарачи на големите автомобилски компании и кои се извозно ориентирани, се укинува стапката од 15 проценти за облоги и плочки за кочници, фрикциони производи и други делови од нетемперирано леано железо. Во металопеработувачката индустрија за над  105 производи, пред се алатни машини,  се намалуават стапките кои  досега изнесуваа 5 проценти и повеќе. Ќе има намалување на царините  и за транспортниот сектор со цел обнова  на возниот парк и намалување на трошоците на  транспортните компании. Се намалуваат царините за автобусите и минибусите од прва категорија од 10 проценти на 5 проценти, а царините за автобусите и минибусите од втора категорија се намалуваат од 15 на 5 проценти. Царините за вагоните и цистерните пак, кои досега изнесуваа 4 проценти, сега се укинуваат. Се укинува стапката што досега изнесуваше 6 проценти за фолии од полиетилен,  што делумно се употребуваат во прехранбената индустрија и во графичката индустрија кај копир апаратите. - На овој начин преку значително намалување и укинување на царинските стапки  Владата директно ќе им помогне на пет-шест сектори што се значајни за македонската индустрија и  коишто во вакви околности кога се соочуваат со предизвиците на европската и светската економска криза  и очекуваат поддршка од Владата, вели Ставрески.  Вкупно сите намалувања изнесуваат околу 30 милиони денари (480 илјади евра) на годишно ниво.