Премиерот Христијан Мицкоски се извини за инцидентите во Собранието, изразувајќи надеж дека вакви настани повеќе нема да се повторуваат. Изјавата следи по протестот на пратеничките групи на СДСМ, ДУИ и Алијансата за Албанците, кои ја напуштија седницата поради навредите упатени од кандидатот за министер за локална самоуправа Иван Стоилковиќ кон пратениците Фатмир Битиќи и Митко Трајчулески.

Координаторот на СДСМ, Оливер Спасовски, посочи дека и однесувањето на премиерот Мицкоски, кој во расправата ги нарекувал пратениците „мизогени“ и „палири“, било причина за револт. Тој упати критики и кон претседателот на Собранието, Африм Гаши, поради отсуство на реакција на настанатата ситуација.

По координацијата со Гаши, опозициските пратеници договорија заклучок за осуда на однесувањето на Стоилковиќ, а лидерот на СДСМ, Венко Филипче, оцени дека заканите и навредите упатени кон пратениците се знак на слабост.

Мицкоски, на крајот од седницата и пред гласањето за новите министри, јавно се извини за случувањата и порача: „Како претседател на Владата, сакам да се извинам на вас, на пратениците и на граѓаните што денеска бевме сведоци на овие настани и се надевам дека тоа никогаш повеќе нема да ни се повтори“.