Од бугарското Министерство за надворешни работи велат дека во контекст на проширувањето на Европската Унија, прашањата поврзани со идентитетот и јазикот треба да се разгледуваат во рамките на научниот и академскиот дискурс, бидејќи по својата природа тие не спаѓаат во опсегот на институционалната проценка на напредокот на земјите-кандидатки во однос на објективните и мерливи критериуми за пристапување.

„Со денешната одлука, Европскиот парламент ја потврди својата улога како непристрасно и независно тело посветено на следење на напредокот на реформите во Република Северна Македонија. Од особена важност се наодите во областа на владеењето на правото, заштитата на основните права и слободи, функционирањето на демократските институции, спроведувањето на клучните реформи, спроведувањето на договорните обврски, како и влијанието на надворешните актери. Ова се аспектите што треба да бидат во фокусот на напорите на властите во Македонија, доколку целта остане одржлива европска интеграција“, соопшти бугарското Министерство за надворешни работи.

Бугарското Министерство за надворешни работи наведува дека Софија доследно ја поддржува европската перспектива на сите земји во регионот на Западен Балкан, врз основа на објективни критериуми за членство и со строго спроведување на принципот на сопствени заслуги.