Јавното обвинителство бара притвор за газдата на работилницата и работникот кој работел со апаратот за брусење при што беше предизвикан огромен пожар во рекреативниот центар „Младост“ кој го доведе во опасност градот Велес и беше изгорена 400 хектари борова шума.

Основното јавно обвинителство Велес нареди спроведување истражна постапка против одговорното лице на работилницата и против четворица ангажирани работници. Освен за газдата и за работникот кој со искрење ја предизвикал огнената стихија, за преостанатите не се бара притвор.

По скратена постапка кривично ќе се гони и градежната компанија која ја ангажирала работилницата. Во моментов се подготвува обвинение за тешки дела против општата сигурност, односно предизвикување општа опасност.