СДСМ го критикува министерот за здравство Арбен Таравари за тоа што Владата на Христијан Мицкоски предвидела смешно ниска провизија за државата – само 1 отсто од годишните приходи од наплатата на паркингот на Клинички центар „Мајка Тереза“. Засега е нејасно дали албанската „Ѓока Констракшн“ ќе биде идниот оператор, затоа што премиерот барем засега демантира дека има договор за јавно-приватно партнерство.

„Министерот Таравари потврди дека Владата на Мицкоски предвидела смешно ниска провизија за државата – само 1% од годишните приходи на паркингот. Ова значи дека паркингот буквално се подарува на приватна фирма!“, велат од СДСМ, додавајќи дека ова значи дозволување огромен профит на сметка на пациентите и граѓаните.

СДСМ најостро ја осудува криминалната зделка за паркингот во Клиничкиот центар, која е директно на штета на граѓаните. Според нив, ова покажува дека Владата на Мицкоски нема никаква грижа за здравствениот систем и пациентите, туку работи единствено за приватни интереси. Додека јавните здравствени установи тонат во долгови и недостиг на ресурси, Владата буквално го распродава државниот имот за безвредни трошки“, сметаат од опозициската партија.

СДСМ тврди дека зад договорот за паркингот на Клиничкиот центар стои криминален интерес и дека Владата не се грижи за пациентите. Според нив, министерот за здравство ја оправдува зголемената цена на паркингот со споредба со цените во трговските центри, што СДСМ го смета за срамно и скандалозно.

„Министерот Таравари ја правда зголемената цена на паркингот, споредувајќи ја со цените во трговските центри. Ова е скандалозно и срамно. Граѓаните ќе плаќаат 50 денари на час за да одат на лекар, наместо 30 како досега. Пациентите немаат избор, тие мораат да дојдат во Клиничкиот центар и владата ги уценува со високи цени”, изјавија од СДСМ, обвинувајќи го министерот за здравство за неодговорност кон здравјето на граѓаните, особено оние кои се соочуваат со сериозни болести.