СДСМ: Зошто Мицкоски ја крие средбата со Главчев во Вашингтон?
СДСМ побара од премиерот Христијан Мицкоски да изнесе детали за средбата со бугарскиот премиер Димитар Главчев во Вашингтон на собирот на НАТО-земјите.
„Зошто Мицкоски ја крие средбата со бугарскиот премиер Главчев? Поминаа 14 часа откако бугарскиот премиер Главчев на долго и на широко раскажа за средбата со Христијан Мицкоски пред медиумите, а Мицкоски никаде го нема да ги соопшти ставовите од таа средба.
Покрај протоколарните убави зборови, Главчев јасно ги повторил позициите на Бугарија дека обврските за Северна Македонија остануваат.
Дали Мицкоски го крие разговорот и се срами да соопшти како поминале неговите барања? Дали воопшто ги поставил барањата за промена на преговарачката рамка?Дали било што од ветувањата кои ги даде пред граѓаните во кампањата го покренал како прашање? Или повторно, по веќе не знаеме кој пат од преземањето на власта, си ја подвиткал опашката?“, реагира СДСМ.
Според опозициската партија, Мицкоски и ВМРО-ДПМНЕ требало да го искористат самитот за зајакнување на македонските позиции во однос на Бугарија и Грција, но и да се остварат важни средби.
„Засега се што добивме се многу насмеани селфи фотографии од министрите, една веќе постоечка инвестиција и никаков успех на дипломатски план. ВМРО-ДПМНЕ секој ден покажува дека ништо од ветеното не планира да реализира ниту има капацитет за тоа“ реагираат од таму.
„На маргините на официјалната фотосесија на лидерите на Влади и шефови на држави на НАТО самитот остварив кус разговор со премиерот на Бугарија, Димитар Главчев. Беше констатирано дека треба да се релаксираат односите, при што посочив дека треба да се гледа на иднината и да се користат можностите за соработка. Темите од минатото и отворањето на нови препреки нема да ги зближат двата народи и дека треба да се направат напори и чекори кои ќе влеат доверба меѓу државите како во периодот пред ветото и отпочнувањето на политиката на опструкции“, порача премиерот.
Слично
Поврзани вести
