Опозициската СДСМ обвинува дека премиерот Христијан Мицкоски се подготвува за внесување на Бугарите во Уставот, посочувајќи дека Заедничката историска комисија меѓу Македонија и Бугарија работи континуирано, без доволна транспарентност кон јавноста.

• -Заменик-министерот за надворешни работи Зоран Димитровски потврди дека Заедничката историска комисија редовно одржува средби. Како е можно јавноста да не знае дека таа работи континуирано веќе две години? – реагираат од СДСМ.

Од партијата прашуваат што е содржината на тие средби и дали тие се поврзани со подготовка на уставни измени.

• -Што се договара зад затворени врати ако не се подготвува внесување на Бугарите во Уставот? – наведуваат од СДСМ.

Според нив, изјавите на премиерот дека „во јуни ќе ги реши сите реформски прашања“ и дека се очекуваат позитивни сигнали од Брисел, директно упатуваат на исполнување на условите за напредок во евроинтеграциите.

• -Основното барање од Европа е внесување на малцинствата во Уставот. Ако се најавува решавање на реформите, тогаш е јасно за што станува збор – истакнуваат од партијата.

Од СДСМ додаваат дека работата на историската комисија е дополнителен индикатор дека процесите се одвиваат, иако тоа, како што велат, не се комуницира јавно.

• -Кога комисијата работи, значи дека паралелно се подготвуваат чекори кои јавно се негираа – велат од СДСМ.

Партијата го повторува својот став дека внесувањето на малцинствата во Уставот е неопходно за продолжување на европскиот пат на државата.

• -СДСМ останува на позицијата дека уставните измени се потребни за напредок кон Европската унија – порачуваат од партијата.