Портпаролот на СДСМ, Богданка Кузеска, информираше дека имињата на министрите во новата Влада ќе бидат објавени вечерва по седницата на Централниот одбор на партијата, како и на оној на коалициониот партнер ДУИ.

- Денеска ќе има Централен одбор. Договорот на коалицијата „Можеме“ предводена од СДСМ ќе биде изгласан од Централниот одбор, како и на оној кој ќе го одржи ДУИ, и секако ќе се донесат одлуките и за кадровските решенија. Деталите за овие прашања ќе бидат објавени по седницата, рече Кузеска.

Засега со имињата на новите министерски позиции и рокади само неофицијално известуваат медиумите, но тие се непотврдени од коалиционите партнери кои вчера објавија дека е постигнат договор за формирање на нова Влада.