Сасоли ги моли нашите млади да не губат надеж за Европа - ние стоиме до вас
Не губете надеж и не се откажувајте од европската иднина на земјата, ова не е крај на дискусијата.
Со овие зборови преку видео обраќање на Твитер претседателот на Европскиот парламент Давид Сасоли ги замоли младите од земјава да продолжат да веруваат во европската перспектива, по недобивањето датум за преговори со Европската унија.
Пред неговата посета на земјава, која ќе се одвива денеска и утре, во видео обраќање на Твитер тој нагласи дека го дели разочарувањето со македонските граѓани, но најави дека дискусијата за почеток на преговорите не е завршена.
„Ве разбирам и го делам вашето разочарување. Ги исполнивте сите критериуми, завршивте одлична работа. Заслуживте зелено светло за почеток на преговорите, но ова не е крај на дискусијата. Европскиот парламент, домот на демократија во Европа стои со вас. Нема да молчиме, ќе притискаме силно за позитивна одлука на следниот состанок на Европскиот совет. Имам едно барање, посебно до младите луѓе во Северна Македонија. Ве молам, не губете надеж. Ве молам, не се откажувајте од европската иднина. Вие припаѓате на нашата фамилија и евентуално ќе бидете дел од оваа фамилија, бидејќи фамилијата ќе ви посака добредојде со верба и надеж“, изјави Сасоли.
Во Скопје, Сасоли ќе се сретне со претседателот Стево Пендаровски, собранискиот спикер Талат Џафери и со премиерот Зоран Заев, а ќе има средби и со лидерите на парламентарните политички партии, и ќе се обрати во Парламентот.
Слично
Поврзани вести
