Амбасадорката на САД во ОБСЕ, Кејт Брнс денеска повтори дека САД oстро ги осудуваат нападите врз пратениците и останатите, и дека се подготвени да работат со новиот собраниски претседател Талат Џафери.

Вели дека за насилството нема место во демократскиот процес. 

„Изразуваме најдлабоко сочувство до оние членови на Парламентот и други кои беа повредени во нападот и нивните семејства. САД ги повикува властите на Република Македонија да се преземат чекори за да се осигура безбедноста на сите членови на Парламентот, да ги истражат нападите темелно, и да ги повикаат на одговорност оние кои ги извршиле, организирале, или наредиле актите на насилство“ - вели Брнс, цитирана од сајтот на американската мисија во ОБСЕ.

Се наведува дека како стратешки партнер и пријател на Македонија, како и со целосно почитување на суверенитетот и унитарноста, САД ги повикува сите страни да ги стават интересите на Македонија и нејзините граѓани над сè друго, да работат конструктивно, и за целосно спроведување на сите обврски од Договорот во Пржино. 

„Ги повикуваме сите страни да најдат решение на несогласувањата на мирен начин и да ги почитуваат законите и демократските процеси во Македонија“ - додаваат оттаму. 

Решавањето на политичката криза може да дојде само преку почитување на законите и почитување на волјата на македонскиот народ, слободно изразена преку демократски процеси, вклучувајќи и врз основа на резултатите од изборите во декември 2016 година, кои беа прифатени од страна на сите страни, смета амбасадорката на САД во ОБСЕ.