На Русија и треба силна рубља, а лабавата монетарна политика е виновна за нејзиниот сегашен пад, изјави денеска Максим Орешкин, економски советник на рускиот претседател.

Курсот на доларот на Московската берза утринава надмина 100 рубљи, првпат од 23 март минатата година, јавуваат руските агенции.

Коментирајќи го овој пад, Орешкин рече дека сегашниот курс на рубљата значително отстапил од основното ниво и дека се очекува негово нормализирање „во блиска иднина“, пренесуваат српските медиуми.

„Слабата рубља ја комплицира структурната трансформација на економијата и негативно влијае на реалниот доход на граѓаните. Силната рубља е во интерес на руската економија“, заклучи Орешкин.

Оваа година руската рубља загуби околу 30 отсто од вредноста во однос на доларот, а Централната банка на Русија смета дека тоа е последица на влошувањето на трговскиот биланс на оваа земја.

Во првите шест месеци, од јануари до јуни, трговскиот суфицит на Русија падна за 85 отсто во споредба со истиот период минатата година, пренесува Танјуг....