Деновиве МЖ Инфраструктура ќе го обајви тендерот за ремонт на железничка делница од Коридорот 10 помеѓу Ногаевци и Неготино, во должина од 31 километар. Ова е прв ремонт на овие пруги после 46 години.

„Ремонтот ќе се состои од комплетна замена на шините со нови, замена на дотарените дрвени прагови со армирано-бетонски прагови, надополнување со нов толчаник. Постоечките шест патни премини во ниво ќе бидат изработени од горен строј од рециклирана гума и нов асфалтен приод во должина од 20 метри од двете страни, со што значително ќе се подобри безбедноста при поминување на возилата преку патните премини. Предвидено е и пероните на шести стојалишта да се реконструираат со вградување на нови армирано-бетонски елементи. Бенефитот од ремонтот е овозможување на возење со проектирана брзина од над 100 километри на час и зголемување на сигурноста во железничкиот сообраќај, а со тоа и зголемување на квалитетот на превозот на патниците и транспортот на стоките“, изјави Ирфан Асани, директор на МЖ Инфраструктура.

За реконструкцијата на двете делници се обезбедени 17,6 милиони евра, од кои 7 милиони евра се потрошени за ремонт на делниците Табановце- Куманово и Миравци- Смоквица кои сеуште се реконструираат, а останатите 10 милиони евра ќе се искористат за втората делница. Ремонтот на втората делница од Коридорот 10 е планирано да заврши во рок од една година од потпичувањето на договорот со фирмата која што ќе ја врши реконструкцијата.