Реконструираната Општа болница во Струмица се очекува да биде пуштена во употреба од септември, најави премиерот Христијан Мицкоски при денешната посета на здравствената установа.

Мицкоски посочи дека реконструкцијата на болницата е значаен проект за Струмица и за целиот регион, бидејќи граѓаните ќе добијат подобри услови за лекување и поквалитетна здравствена услуга.

Одговарајќи на новинарско прашање за најавената реконструкција на Владата и кога ќе започнат официјалните разговори со коалициските партнери, премиерот изјави дека средбите се веќе закажани.

„Во петок и во сабота се закажани средбите со коалициските партнери, со ВРЕДИ и со ЗНАМ“, изјави Мицкоски.

На прашањето дали ВРЕДИ и понатаму ќе биде префериран коалициски партнер, а не ДУИ, Мицкоски рече дека во моментов Владата не е во предизборен период, туку во втората половина од мандатот, каде што веќе постои воспоставена соработка.

„Сега не сме пред избори. Сега сме во втората половина на мандатот, имаме соработка и така да продолжиме. Зошто да не продолжи“, порача премиерот.