Од понеделник во собраниска процедура треба да влезе извештајот за разрешување на специјалната јавна обвинителка Катица Јанева, паралелно со расправата за законот за јавно обвинителство со кој се решава идниот статус на СЈО.

Според собраниската процедура, претседателот на собраниската Комисијата за избори и именувања, Илија Димовски, треба да закаже седница на која ќе се одлучува за разрешувањето на Јанева. Димовски вчера изјави дека штом го добие извештајот ќе пристапи под итно во насока на забрзување на постапката. Евентуалната одлука на Собранието за разрешување на Јанева, согласно процедурата, повторно треба да се најде пред Советот на јавни обвинители.

Ацо Колевцски, новиот претседател на Советот на јавни обвинители, вчера потврди дека извештајот во кој е аргументирано разрешувањето на Јанева како осомничена во случајот „Рекет“ е испратен во законодавниот дом.