Oд Исламската верска заедница стигна осуда за скандирањето „УЧК, УЧК“ на протестот за случајот „Монструм“, кој во петокот се одржа во Скопје. 

Пораката е дека секој радикализам е штетен и за верата и за државата и дека треба со зеднички напори да се настојува за мир и соживот. 

Заедничка осуда на радикализмот и национализмот, како и на неодамнешното скандирање „УЧК УЧК" и „голема Албанија“ е нешто околу што се согласиле првите луѓе на Центарот за управување со кризи Стојанче Ангелов и Екрем Зендели со поглаварот на ИВЗ Шаќир Фетаху. Средба  се одржа во Ријасетот, соопштија од ЦУК.

Ангелов и Зендели му искажале признание на поглаварот за неговиот авторитет и позитивно влијание кај сите граѓани, а во разговорот, како што е наведено, тројцата соговорници постигнале согласност дека е важно да продолжи процесот на помирување меѓу дел од Македонците и дел од Албанците. Согласност е постигната и дека е потребно да продолжат напорите за искоренување на меѓуетничкото насилство кај младите, но и да не наседнуваат на повиците на омраза. Во соопштението е наведено дека согласност е постигната и во осудата на случаите на радикализам и национализам, „како на пример, неодамнешното скандирање „УЧК-УЧК“ и „Голема Албанија“ на каков било митинг, протест или настан, бидејќи тоа директно го дефокусира вниманието од целта на настанот, од протестирањето и ја подгрева меѓуетничката нетрпериливост и омраза".

Стотици Албанци минатата недела протестираа во близина на зградата на Јавното обвинителство поради  судењето за случајот „Монструм" и барањето на обвинителката Фатиме Фетаи обвинетите да добијат максимални затворски казни за делото тероризам. Тие побараа оставка на Фетаи  и странски мониторинг на процесот.