Бугарскиот претседател Румен Радев вели дека напредокот на Република Северна Македонија кон полноправно членство во Европската Унија е стратешка цел за Бугарија.

Но, додаде дека тоа ќе зависи од подготвеноста и политичката волја на земјава да ги исполни критериумите за членство во ЕУ и почитувањето на правата на граѓаните кои отворено го изразуваат својот бугарски национален идентитет.

„За решавање на прашањата во билатералните односи меѓу Бугарија и Република Северна Македонија е потребна политичка волја, активен институционален дијалог и постигнување неповратност во градењето добрососедски односи“, рече Радев.

На дискусијата присуствувале и потпретседателот Илиана Јотова, како и бугарски научници, експерти, дипломати и новинари.

Европскиот парламент вчера не го усвои амандманот на Резолуцијата за Македонија на социјалистите и зелените со кој се осудуваше реториката на Бугарија кон земјава за историските прашања.