На свечен начин синоќа беше пуштен во употреба новиот објект во кој ќе биде сместена целата администрација на Општина Карпош. Зафаќа вкупна површина од 4.500 м2, а за финалната изградба беше потребно нешто повеќе од една деценија. 

- „Сè започна со еден камен –темелник. Можеби тогаш изгледаше како празно парче земја, но за нас тоа беше визија – сон за една нова општинска зграда, достојна за граѓаните на Карпош. Трпеливо но сигурно, месец по месец, цигла по цигла, од темелите израснаа ѕидови. Со мака, со работа и со посветеност, чекор по чекор го изградивме овој објект. Не беше лесно, но секогаш кога имаш јасна цел, секоја пречка се надминува“ – објасни Јакимовски.

Првиот човек на Општината потенцираше дека новата општинска зграда не е наменета само на администрацијата. туку таа ќе биде транспарентна локална установа која им припаѓа на сите граѓани на Карпош.

- „Мојот сон и мојата визија беше тука да влегувате со доверба и овде да ги добивате вашите одговори и решенија. Ова е нов дом на локалната самоуправа, поточно дом на сите наши сограѓани. Карпош гради, расте и ќе продолжи да чекори напред, затоа што ова е нашата заедничка приказна“ – додаде градоначалникот Стевчо Јакимовски.