Триесет и осум мигранти биле пронајдени вчера на регионалниот пат Гевгелија-Скопје, во товарно моторно возило „форд транзит“ во близина на базата на „Актор“ пред тунелите кај Демир Капија. 

Триесет и пет од нив се од Пакистан, а тројца се од Индија.

Откако полициските службеници го забележале товарното возило со велешки регистарски таблички во близина на месноста Арсови лаки и дале знак за запирање, возачат не запрел туку продолжил да се движи кон тунелите кај Демир Капија. Полициската патрола поради сомневање се упатила по возилото и по извесно време возилото е пронајдено, оставено и без возач, со мигрантите сместени во товарниот дел од комбето.

„Со проверки е констатирано дека возилото имало лажни регистарски таблички. Со мигрантите кои биле на возраст од 17 до 41 година извршен е разговор, при што е констатирано дека тие илегално пешки влегле во Македонија од Грција во текот на претходната ноќ, а со помош на лица, исто така, мигранти. Тие влегле во Македонија со намера илегално да транзитираат преку Србија, до западноевроските земји, а за цена од околу 4.000 евра, поединечно, до крајната дестинација“, соопшти МВР.

Се работи на целосно расчистување на случајот и откривање на инволвираните лица.