Родителите на учениците од Основното училиште Григор Прличев во Железара со петиција бараат од училиштето да не се запишува ученик кој од оваа година треба да учи таму, а кој поради своето однесување, веќе не посетува настава во претходното училиште во кое учел.

Родителите алармираат на негово ризично и загрижувачко однесување, а се работи за ученикот од Општина Аеродорм, за кого претходно се пишуваше во медиумите, а против чие префрлање од училиштето „Лазо Ангеловски“ во училиштето „11 Октомври“ во Центар имаше и протести. Петицијата, објавена на „Зелена Железара“, ја објавуваме во целост:

„Ние долупотпишаните родители на ученици од ООУ Григор Прличев Скопје-Населба Железара, Општина Гази Баба ја поднесуваме оваа петиција до училиштето а поради следните причини:
Имено како родители а по неофицијална информација стекнавме сознание дека од оваа година во нашето училиште треба да посетува настава ученик кој поради своето несоодветно, недолично  насилно и загрижувачко однесување кон соученици и наставнички кадар повеќе не посетува настава во училиштето во кое претходно посетувало настава. Впрочем, случајот за овој ученик е веќе добро познат на пошироката јавност со оглед да за неговото ризично и загружувачко однесување при посетувањето на наставата во претходното училиште веќе се пишуваше и објавуваше по печатените и електронски медиуми и портали во нашата држава.
Во таа смисла како родители ја изразуваме  нашата сериозна загриженост и нашето незадовлство и несогласување да овој ученик од оваа година отпочне со посетување на настава во нашето училиште-ООУ Григор Прличев н.Железара, Скопје и бараме овој ученик ДА НЕ ГО продолжи своето школување во нашето училиште. 
Доколку нашата оправдана загриженост и несогласување не биде разбрана и прифатена укажуваме дека ќе ги првземеме сите законски мерки а не е исклучена можноста  од бојкот на наставата, односно нашите деца нема да одат на училиште и да посетуваат настава.   
Со надеж дека оваа наша петиција сериозно ќе биде разбрана,
Со почит, 
Родители на ученици од ООУ ГРИГОР ПРЛИЧЕВ-Скопје
н.Железара“, стои во петицијата.

Набрзо по објавата, текстот на петицијата беше избришан од групата „Зелена Железара“.