МВР поднесе кривична пријава против четири лица поради узурпација на земјиште во сопственост на МПЦ-ОА, кај месноста Манастирец, покрај патниот правец Дебар-Струга, кое претходно со денационализацијата му било вратено во сопственост на Бигорскиот манастир.

– Поради постоење основи на сомнение за сторени кривични дела „узурпација на недвижности” и „бесправна градба”, ОВР Дебар поднесе кривична пријава против Н.Б.(88) од дебарското село Џепиште, Ј.Б.(62) и С.А.(41), двајцата од Скопје и М.Х.(33) од Дебар, информираше Стефан Димоски портарол на Секторот за внатрешни работи-Охрид.

Пријавените во текот на минатата година на различни катастарски парцели кај местото „Три чешми“, атар на општина Центар Жупа, покрај реката Црни Дрим и езерото Шпилје,  бесправно изградиле објекти. Н.Б. се стекнал со противправна имотна корист од 150.480 денари, Ј.Б. со 106.920 денари, С.А. со 33.660 и М.Х. со 466,527 денари.

Деновиве, по истите основи, кривични пријави беа поднесени против двајца скопјани, кои се стекнале со противправна материјална корист од 69.300 денари, односно од 37.431. денари.